7個當媽媽後先明白嘅「虎媽」心態，你中幾多個？

 

「虎媽」嘅定義係乜？生哲哲貓之前，喺街上見到其他爸媽嘅行為，覺得佢哋「好虎」，但原來有啲心態同標準，真係要當媽媽後先會明白。各位爸媽，你又中咗幾多個？

1.    炸雞去皮、M記薯條汽水轉粟米粒+鮮奶
當媽媽前：咁驚小朋友食煎炸熱氣食物，就唔好帶佢去食啦！睇住其他人有得食，自己冇，幾陰公！
當媽媽後：雞皮炸過又濃味細路仔唔食得，食少少雞肉佢就以為自己食咗炸雞架啦！（擺明呃細路）邊個話去M記一定食薯條？粟米粒同鮮奶都有M字標誌，小朋友見到個Logo就信食咗麥記，幾健康啲咪幾好！如果真係食薯條記得叫「走鹽」噃。

2.    蒸魚生壽司
當媽媽前：蒸壽司點食呀？咪玩啦！
當媽媽後：蛋壽司、鰻魚壽司表面係熟食，但點知廚房處理嗰陣有冇生熟分開？爸媽想食，啲細路又都跟住要食，咪唯有買外賣壽司返屋企，蒸熟幾嚿畀小朋友食，大人細路都有得食，滿意！

3.    一個人仔N對鞋
當媽媽前：小朋友鞋細細對就幾嚿水，仲貴過啲大人鞋，使唔使呀？我細個都係街市鞋鋪其求買對白色鞋，返學去街乜都係佢架啦！
當媽媽後：返學一對皮鞋；一對運動鞋；行街著行街鞋；跑步踩單車著跑鞋；落雨著水鞋；游水著大頭涼鞋；小朋友多才多藝嘅話會有埋滾軸溜冰鞋同跳舞體操技巧鞋；仲有，屋企著嗰對永遠唔黐腳嘅拖鞋……

4.    口罩款式要襯衫夾時節
當媽媽前：不拘款式，只要合規格，每人平均有三個月用量儲備就得。
當媽媽後：小童彩虹色口罩60個、漸變色口罩50個，喵喵臉口罩100個、卡通口罩3款，每款各兩盒、聖誕新年節日限定口罩4盒……噢，小朋友塊面仔大得快，唔啱size，又要再買過！

5.    節日送禮物畀小朋友
當媽媽前：平日供書教學有得食有得著仲唔夠啊？一世人幾十個生日、復活節、聖誕節，有咩咁值得慶祝？唔好整慣哂過時過節要送禮物，一送開就年年都要送，縱壞！
當媽媽後：小朋友感受下節日氣氛都好，第日係好值得回味嘅童年回憶。生日一年一次，一年加埋只得幾個大節日，唔使得幾多錢，開心下囉！

6.    幫小朋友孭書包
當媽媽前：自己書包梗係要自己孭啦！成世有人服侍咩？我細個嗰陣，個書包幾重都係自己孭架啦！
當媽媽後：幼稚園學校書包設計差，又重又唔符合人體工學，加埋啲書嘅重量，咁細個豆丁點孭呀？萬一孭到腰骨孿咗點算？自己細個時冇人幫，唔代表依家都要咁對啲細路架嘛！

7.    熱愛返學
當媽媽前：返學好痛苦。
當媽媽後：我真係好鍾意佢返學！（唔包括網課）

以上嘅虎爸虎媽嘅行為同心理，其實都係出於對小朋友嘅關愛，只要適時放手，唔好變成溺愛就係啦！

爸媽一定要緊貼金牛急躁媽的文章和到【哲哲貓的貓貓世界】facebook和IG，留意育兒資訊和交流心得啊！