哲哲貓話要同媽媽結婚！童心童話幼兒婚姻敏感期

最近哲哲貓的舅父要結婚了，急躁媽趁機跟哲哲貓，童心童言童話婚姻教育，真的很有趣！

媽：「哲哲貓，你舅父要結婚呀，我哋要去睇佢同姨姨簽紙。」  

哲：「咩叫結婚呀？」  

媽：「結婚即係同一個你好鍾意好鍾意嘅人以後都一齊生活，無論發生咗咩事都同佢一齊面對。結婚嗰陣要喺張結婚證書上面簽名，好似媽媽爸爸同你簽手冊咁，簽完名之後，你同嗰個人就係屋企人。」  

哲：「媽媽你幾時結婚呀？」  

媽：「媽媽結咗婚啦，爸爸同媽媽決定以後都係埋一齊，就簽名結婚，之後生咗你囉。」  

哲：「唔制！我要同媽媽結婚！」（嘩！聽到呢句媽媽心都甜埋）  

媽：「唔得㗎，我已經同爸爸結咗婚，唔可以再結啦。」  

哲：「咁我幾時結婚呀？」  

媽：「你第日大個搵到一個你好鍾意好鍾意嘅人就結婚。係喎，舅父同姨姨簽完紙，結咗婚之後，你就要叫姨姨要做舅母啦。」  

哲：「點解嘅？」  

媽：「因為結咗婚之後就係屋企人，叫法就會唔同，表示是我哋係一家人嘅關係。結婚嗰日我哋要著紅色衫，著返你中秋節嗰件套好唔好？」  

哲：「點解要著紅色呀？」  

媽：「紅色係喜慶，即有開心事嘅顏色，所以我哋會著紅色。到時爸爸媽媽公公婆婆都會著紅色、粉紅色、棗紅色，呢類紅色色系嘅衫，配合舅父結婚呢個好開心喜慶嘅場合。」  

公公：「哲哲貓，你咁鍾意食冬菇，不如你第時同冬菇結婚啦！咁咪日日有冬菇食囉！」  

哲：「我唔會同冬菇結婚架！」

公公：「日日有冬菇食唔好咩？」  

哲：「我唔同冬菇結婚，我同媽媽結婚！」（媽媽繼續心心眼）

小朋友到了4至5歲就進入婚姻敏感期，有時候會說要跟爸爸或媽媽結婚，有時候會跟不同的異性同學出雙入對說要結婚。爸媽可趁機講解婚姻關係就是兩人相親相愛，雙方決定廝守一生等，為幼兒奠定結婚的概念。如果小朋友出現「被失戀」的情況，爸媽可教導他們「選擇的權利」。切忌抹殺幼兒對結婚的好奇心，甚至批評他們每天轉換「伴侶」等行為，以免他們對婚姻有不良的印象。

爸媽一定要緊貼金牛急躁媽的文章和到【哲哲貓的貓貓世界】facebook和IG，留意育兒資訊和交流心得啊！